الإشعارات القانونية والخصوصية

من نحن

Colivraison Express هي شركة لوجستيك مقرها تكسرين بئر خادم، الجزائر العاصمة. ندبّروا تحضير الطلبيات تاع التجارة الإلكترونية والتوصيل بالدفع عند الاستلام في 58 ولاية. هاد الصفحة تشرح كيفاش ندبّروا بياناتك وواش راح تلقى كي تتفاعل مع الموقع.

واش نجمعوا من البيانات

كي تعمّر استمارة التسجيل، نجمعوا اسمك، لقبك، إيمايلك، رقم هاتفك، اسم محلك، تقديرك للحجم الشهري، وكود الكوبون إذا استعملت واحد. نحتاجو هاد المعلومات باش نعاودوا نعيّطوا لك، نفتحوا حسابك، ونتابعوا. ما نبيعوش هاد البيانات، ما نمرّروهاش للمعلنين، وما نزيدوهاش مع trackers خارجية.

إذا غير تشوف الصفحات العامة (الرئيسية، المدونة، المقالات) بلا ما تعمّر شي استمارة، ما نخزّنوا والو يعرفك شخصيًا — غير الإحصائيات لي مذكورة تحت.

الكوكيز والـAnalytics

نستعملوا Google Analytics 4 باش نفهموا أي صفحات يقرأوها الناس، أي مقالات تجلب الزوار، أي أزرار يتنقروا، ومن وين تجي الزيارات تقريبًا. هذي تضع شوية كوكيز في navigateur تاعك. تقدر ترفضها من البانير لي يبان أول مرّة، وتقدر تمسحها من المتصفّح في أي وقت.

ما نستعملوش أي pixel إشهاري آخر — لا Meta Pixel على هاد الدومين، لا TikTok pixel، لا tags تاع remarketing.

منو يشوف بياناتك

معلومات التواصل تاعك تبان للفريق التجاري تاع Colivraison Express (باش يعيطوا لك) وللمجموعة الصغيرة لي تدبّر الـadmin. كل شي مخزّن في قاعدة البيانات تاعنا، على البنية التحتية لي نشغّلوها بنفسنا. ما راناش نبيعوا قوائم contacts.

قدّاش نحتفظوا بها

إذا سجّلت وما وليتش زبون، نحتفظوا بمعلوماتك حتى لـ24 شهر للمتابعة، ومن بعد نمسحوها. إذا وليت زبون، ملفّك يبقى ما دام الحساب نشيط، ولفترة الاحتفاظ القانونية بعد ما يتسكّر.

حقوقك

تقدر تطلب منّا في أي وقت : تشوف البيانات لي عندنا عليك، تصلّحها، ولا تمسحها. أبعث الطلب لـ[email protected] من نفس الإيمايل لي سجّلت بيه، ونعالجوا الطلب في مدّة معقولة.

شروط استعمال الموقع

محتويات الموقع (نصوص، صور، شعارات، رسومات) ملك Colivraison Express، إلا إذا أُشير غير ذلك. تقدر تقرا، تقتبس، وتشارك مع ذكر المصدر — رجاءً ما تنسخش مقال كامل بلا ما تطلب. ما تحاولش تكسّر ولا تمسح الموقع ؛ هاد يشمل brute-force تاع endpoint الكوبون ولا استمارة التسجيل، الزوج محميين بـrate-limit ومراقبين.

الروابط الخارجية

المدونة وبعض صفحات المنتوج تشير لمواقع تالتة (Shopify, Meta, Aliexpress…). ما نتحكّموش في هاد المواقع وشروط الخصوصية تاعها تطبّق كي تروح ليها.

التحديثات

إذا بدّلنا شي حاجة مهمّة في طريقة معالجة البيانات، نحدّثوا هاد الصفحة ونحرّكوا التاريخ في الفوق. إذا التغيير يهمّك مباشرة — مثلاً شريك analytics جديد — البانير تاع الموافقة يرجع يبان باش تراجع الإعدادات.

اتصال

أسئلة الخصوصية والقانون : [email protected] — ولا عيّط على +213 550 10 10 64 في ساعات العمل.